2013/01/03

كۆمەڵە چیرۆكێكی ژنە نووسەری كوەیتی لەیلی عوسمانە


خیانەت
كۆمەڵە چیرۆكێكی ژنە نووسەری كوەیتی لەیلی عوسمانە  
وەرگێڕانی لە عەرەبییەوە ئاسۆ وەهاب

خیانەت
لەژنەكەی پرسی:" چەند جار خیانەتت لێ‌ كردووم ؟؟"
وەڵامی دایەوە:" بەقەد ژمارەی زلەكانت "
ژنە پرسیاری لە پیاوەكەی كرد:" ئەی تۆ چەند جار خیانەتت لێ‌ كردووم ؟؟"
وەڵامی دایەوە:" بەقەد ژمارەی گومانەكانت "... هەردووكیان پێكەوە بورانەوە ..
وارس
بەدەستە رەقەڵەكانی كێشای بەسەر سنگیاو هاواری كرد:" تا مردن تەڵاقت نادەم "
ژنە هەرەشەی كرد:" خۆم دەكوژم ".. بەرەو حەمام رایكردو دەستی بۆ بوتوڵی كلۆرۆكسەكە برد
پیاوە بە بزەوە لەماڵا چووە دەرێ‌:" سبەی دەبمە خاوەنی هەموو شتێك...من تەنها وارسی ئەوم ".
ترس
كچە خەریكبوو لەخۆشییا بفڕێ‌ كاتێك ئەو ویستی ئەنگوستیلەی هاوسەرێتی لە پەنجەی كا، كچە هاتە مێشكیا لێی بپرسێ‌:" بۆ دوای دەساڵا ژنەكەت تەڵاقدا ".
بەبێزێكی زۆرەوە وتی:" دەموچاوی چرچ ولۆچ بوو "
كچە لەئاوێنە دا سەیری دەموچاوی ساف ولوسی خۆی كرد...ئەنگوستیلەكەی بۆ پیاوە فڕێ‌ دا ..
جیاوازی
لە بەردەم ئاوێنەكە وەستا، راما لە وێنەكەی خۆی، سەرپۆش ونیقابەكەی لادا، هەردوو دەستكیش وكراسە شۆڕەكەی داكەند، ئومێدی كرد ببێت بە پشیلەیەك وبەشەقامەكاندا پیاسە بكات ..
شەڕكردن
ژنە وتی:" من پشیلەم "
پیاوە وتی:" من سەگم "
شەڕێكی زۆر توندیان كرد، كە وازیان هێنا تەواو بێهێزبوون..خوێناوی بوون.
ئەو وتی:" من ژنم "
ئەم وتی:" من پیاوم "...یەكتریان لە ئامێز گرت .
نامەكان
هەموو ئەو نامانەی لەگەڵا كوڕە گۆڕابوویان كۆكردەوە، بڕیاریدا بیاندڕێنێ‌، وتی:" ئەمە ئاوی دڵم نادات "كچە بیریكردەوەنامەكان بە ئاو بشوات، وتی:" ئاو هەموو ئەو وشانە ناسڕێتەوە "، بیریكردەوە بیانسووتێنێ‌، گوێی لە ورتەی وشەكان بوو دەیان وت:" دوای ساڵێك، نامەی خۆشەویستی تر دەخوێنێتەوەو دواتر دەیانسوتێنێ‌ " ..
بۆن
بە بەردەمیا گوزەری كرد، بۆنی بەرفامەكەی هەڵمژی ولە سینەیدا شاردییەوە، كاتێك چووە سەر نوێنەكەی وژنەكەی بە بۆنی رۆژانەیەوە هاتە سەر نوێنەكە، بۆنەكەی ناو سینەی ئازادكردو توانی بخەوێ‌ ..